Fyrsta bikarmót haustins - Ljósanótt 6 september

Hnefaleikasamband Íslands (HNÍ) í samstarfi við Hnefaleikafélag Reykjaness stendur fyrir fyrsta bikarmóti haustannar laugardaginn 6. september kl. 13:00 í Blue Höllinni í Reykjanesbæ.

Mótið er hluti af dagskrá Ljósanætur og er einstakt tækifæri fyrir áhorfendur til að fylgjast með efnilegum hnefaleikamönnum og -konum sýna styrk, tækni og keppnisskap í hringnum.

Áhorfendur fá á staðnum QR-kóða sem hægt er að skanna til að taka þátt í kosningu á vinsælasta boxara dagsins. Vinsælasti boxarinn hlýtur sérstök verðlaun að upphæð 100.000 krónur.

„Við erum spennt að hefja haustönnina með kraftmiklu móti á Ljósanótt og bjóða íbúum og gestum Reykjanesbæjar að upplifa alvöru hnefaleikaandrúmsloft,“ segir stjórn HNÍ.

Aðgangseyrir: 1.500 kr.

Staðsetning: Blue Höllin, Reykjanesbær

Dagsetning: Laugardagur 6. september

Tímasetning: kl. 13:00 - Húsið opnar klukkan 12:00

HNÍ hvetur alla áhugamenn um íþróttina til að mæta og styðja við ungt og efnilegt hnefaleikafólk.

Danskur landsliðsþjálfari heldur æfingabúðir fyrir HNÍ

Rachid Idrissi er núverandi landsliðsþjálfari í hnefaleikum í Danmörku og hefur gegnt mikilvægu hlutverki í þróun íþróttarinnar þar í landi. Hann hefur leitt danska landsliðið á stærri alþjóðamótum og fylgst náið með frammistöðu keppenda innanlands, sérstaklega í tengslum við mót eins og danska meistaramótið og alþjóðleg ungmennamót.

Rachid Irdissi heldur æfingabúðir í húsakynnum HFK í Kópavogi dagana 23. - 25. maí. Æfingabúðirnar eru opnar öllum sem stefna á að keppa og eru sparrhæfir. Skráning fer fram í gegnum hnefaleikaklúbbana sem sjá svo um að senda skráninguna beint til HNÍ.

Idrissi á sjálfur langan feril að baki sem keppandi. Hann byrjaði að æfa aðeins 11 ára og varð sexfaldur danskur meistari áður en hann hætti árið 2001. Í kjölfarið stofnaði hann Herlev Boxing, hnefaleikafélag sem hefur vaxið hratt og orðið eitt af þeim fremstu í Danmörku.

Sem þjálfari leggur hann áherslu á agaða nálgun og góðan undirbúning og vinnur náið með Danmarks Bokse-Union við val og þjálfun landsliðsboxara. Hann er einnig virkur í að fylgjast með og styðja unga boxara sem eru að stíga sín fyrstu skref í íþróttinni.

Rachid Idrissi er því lykilmaður í dönsku hnefaleikastarfi, bæði hvað varðar þjálfun keppenda og stefnumótun innan landsliðsins.

Íslenska landsliðið sótti þrenn gullverðlaun á ungmennamóti í Finnlandi

Íslenska landsliðið í hnefaleikum tók þátt í Pirkka Tournament í Tampere í Finnlandi helgina 10.–12. maí. Mótið er eitt stærsta ungmennamót Norðurlanda og tóku um 200 keppendur frá 10 löndum þátt. Ísland sendi sjö unga og efnilega keppendur til leiks – og stóðu þeir sig allir með miklum sóma.

Liðið skipuðu:

• Tristan Styff Sigurðarson (-51 kg U15)

• Hilmar Þorvarðarson (-46 kg U17)

• Kormákur Steinn Jónsson (-66 kg U17)

• Ronald Bjarki Mánason (-50 kg U19)

• Björn Jónatan Björnsson (-65 kg U19)

• Sölvi Steinn Hafþórsson (-70 kg U19)

• Alejandro Cordova (-75 kg U19)

Þrjú gullverðlaun – mikilvæg reynsla og sterk andstaða

Kormákur Steinn Jónsson hóf mótið með sannfærandi sigri gegn Oksala frá Finnlandi og tryggði sér gullið með frábærri frammistöðu gegn Norðmanninum Ilker Ekrem í úrslitum.

Ronald Bjarki Mánason fór beint í úrslit þar sem hann sigraði finnskan andstæðing sinn, Chowin Ea, af öryggi.

Hilmar Þorvarðarson stóð sig einnig frábærlega í úrslitaviðureign sinni gegn Aku Ahola frá Finnlandi og hlaut gullverðlaun með einróma dómaraákvörðun eftir skemmtilegan og tæknilegan bardaga.

Silfur og brons – sterk mótstaða og jákvæð frammistaða

Alejandro Cordova keppti í úrslitum gegn hinum hávaxna Liz Zharku frá Finnlandi. Í jöfnum og tæknilegum bardaga laut Alejandro lægra haldi og hlaut silfurverðlaun.

Björn Jónatan Björnsson mætti einum sterkasta keppanda mótsins, Jan Januszewski frá Póllandi, þreföldum pólskum meistara og Evrópufara. Þrátt fyrir góða frammistöðu varð Björn að sætta sig við bronsið.

Tristan Styff stóð í harðri viðureign við Milo Ristola frá Finnlandi sem síðar var valinn besti keppandi U15 flokksins. Tristan tapaði eftir jafna viðureign og fékk verðskuldað brons.

Sölvi Steinn Hafþórsson glímdi við Oliver Ikonen frá Finnlandi. Eftir jafnan bardaga féll dómaraákvörðunin hinum megin og Sölvi hlaut bronsverðlaun.

Þjálfarar liðsins voru:

• Davíð Rúnar Bjarnason

• Kjartan Valur Guðmundsson

• Benedikt Gylfi Eiríksson

  
  

Hnefaleikasamband Íslands óskar liðinu til hamingju með árangurinn – þetta er skref í rétta átt fyrir áframhaldandi uppbyggingu íþróttarinnar hér á landi.