Ársþing Hnefaleikasambands Íslands 2026

Ársþing Hnefaleikasambands Íslands fór fram laugardaginn 9. maí 2026 í sal ÍSÍ í Laugardal þar sem farið var yfir starfsemi sambandsins á síðasta starfsári, samþykktar lagabreytingar og kosið í nýja stjórn sambandsins.

Á þinginu var farið yfir skýrslu stjórnar, ársreikning 2025 og fjárhagsáætlun fyrir árið 2026 ásamt afreksstefnu og aðgerðaráætlun sambandsins til næstu ára. Mikil áhersla var lögð á áframhaldandi uppbyggingu innan sambandsins, markvissari verkefnastýringu og styrkingu á afreks- og mótastarfi.

Ársreikningur sambandsins sýndi jákvæða niðurstöðu og sterkari fjárhagsstöðu en áður, samhliða aukinni starfsemi innan HNÍ. Á þinginu kom fram að árið hefði einkennst af markvissari uppbyggingu og skýrari stefnu í starfi sambandsins.

Landsliðsstarf og alþjóðlegur árangur

Skýrsla landsliðsnefndar sýndi fram á aukna virkni og góðan árangur íslenskra keppenda á alþjóðlegum vettvangi á síðasta ári. Íslenskir keppendur unnu til verðlauna á mótum í meðal annars Finnlandi, Danmörku, Lettlandi, Portúgal og Bandaríkjunum. Sérstaklega var árangur yngri landsliðsflokka sterkur og á Ísland nú tvo Norðurlandameistara í hnefaleikum.

Landsliðsnefnd kynnti jafnframt stefnu ársins 2026 þar sem áfram verður lögð áhersla á þróunarverkefni, stigvaxandi verkefnaval og markvissari uppbyggingu landsliðsstarfsins.

Diplómastarfið heldur áfram að vaxa

Á þinginu var einnig farið yfir starf diplómanefndar þar sem fram kom að diplómamót hefðu verið mjög vel sótt undanfarin ár. Árið 2025 voru haldin alls átta diplómamót með 47–68 keppendum á hverju móti og Íslandsmeistaramót í diplómahnefaleikum haldið í fyrsta sinn.

Lögð var áhersla á mikilvægi diplómastarfsins sem grunn að áframhaldandi þróun ungra iðkenda og sem öruggt og uppbyggjandi keppnisumhverfi fyrir yngri flokka. Einnig var kynnt framtíðarsýn nefndarinnar þar sem stefnt er að stærri mótum í íþróttahúsum, tveimur keppnishringjum á stærri mótum og áframhaldandi uppbyggingu mótastarfs um land allt.

Endurvakning dómaranefndar og aukin fagmennska

Dómaranefnd HNÍ var endurvakin á starfsárinu eftir að hafa verið lítið virk um tíma. Áhersla var lögð á aukna fagmennsku, hlutleysi í dómgæslu og frekari menntun dómara. Erlendir matsmenn og leiðbeinendur frá Norðurlöndum komu til landsins á árinu og haldin voru bæði dómaranámskeið og námskeið í diplómahnefaleikum.

Dómaranefnd lagði jafnframt áherslu á áframhaldandi þróun dómarastarfsins og mikilvægi þess að fleiri taki þátt í starfi nefndarinnar.

Mótahald og uppbygging innanlands

Í skýrslu mótanefndar kom fram að unnið hefði verið markvisst að því að styrkja mótahald innanlands og skapa betri umgjörð fyrir þróun hnefaleika á Íslandi. Mótadagskrá sambandsins var endurskoðuð í samráði við aðildarfélög með það að markmiði að skapa skýrara og markvissara mótaumhverfi.

Á árinu voru meðal annars haldin bikarmót víðs vegar um landið, Kónga- og drottningamót Hnefaleikafélags Hafnarfjarðar og byrjendamót með góðri þátttöku. Mótanefnd lagði áherslu á mikilvægi reglulegs mótahalds og hvatti félög áfram til að halda eigin klúbbamót og styðja við áframhaldandi uppbyggingu íþróttarinnar.

Ný stjórn kjörin

Kosið var í nýja stjórn sambandsins á þinginu.

Ólafur Guðlaugsson var kjörinn formaður Hnefaleikasambands Íslands til næstu tveggja ára. Aðrir kjörnir stjórnarmenn eru Almar Ögmundsson, Sævar Ingi Rúnarsson, Kristjana Ósk Veigarsdóttir og Davíð Már Almarsson.

Á þinginu voru fráfarandi formaður HNÍ, Jón Lúðvíks, og fráfarandi stjórn jafnframt þökkuð fyrir þeirra störf og framlag til áframhaldandi uppbyggingar sambandsins á síðustu árum.

Í lok þings tók nýr formaður sambandsins til máls og lýsti yfir vilja til áframhaldandi uppbyggingar og samstarfs innan íslenskra hnefaleika.

HNÍ þakkar öllum fulltrúum, nefndum, sjálfboðaliðum og aðildarfélögum fyrir þátttöku á þinginu og áframhaldandi stuðning við uppbyggingu íslenskra hnefaleika.