Íslenski hópurinn vann til þriggja gullverðlauna á Pirkka mótinu í Finnlandi

Íslenski hópurinn stóð sig afar vel á alþjóðlega Pirkka mótinu í Finnlandi dagana 8.–10. maí þar sem ungu keppendurnir sýndu bæði mikinn karakter og sterkar frammistöður gegn öflugum andstæðingum víðs vegar að.

Á mótinu kepptu ellefu íslenskir hnefaleikamenn í unglinga- og U19 flokkum og var uppskeran glæsileg, alls þrjú gullverðlaun, þrjú silfur og þrjú brons.

Meðal þeirra sem stóðu upp úr var Ronald Bjarki Mánason sem tryggði sér gullverðlaun eftir sigur á sænskum andstæðingi í úrslitum. Þetta er sjöunda alþjóðlega mótið í röð sem Ronald vinnur og hefur hann vakið athygli á alþjóðlegum mótum að un

danförnu. Evrópska hnefaleikasambandið fjallaði sérstaklega um frammistöðu Ronalds á opnunardegi mótsins: https://www.europeanboxing.org/news/manason-ndakola-and-vilen-impressed-in-the-opening-day-at-the-pirkka-tournament/

Adam Alabsi vann einnig gull eftir mjög sannfærandi frammistöðu og Sigurbergur Einar Jóhannsson tryggði sér gull með yfirburðasigri eftir að bardagi hans var stöðvaður í annarri lotu.

Hilmar Þorvarðarson komst í úrslit eftir glæsilegan sigur í undanúrslitum þar sem hann stöðvaði andstæðing sinn í fyrstu lotu. Í úrslitunum mætti hann afar sterkum finnskum keppanda og endaði með silfurverðlaun. Þá náðu einnig Arnar Jaki Smárason og Yahya Ghazali silfurverðlaunum eftir harða og jafna úrslitabardaga gegn heimamönnum.

Neilas Sachniukas, Kristján Eðvarð Sigurvinsson, Viktor Örn Sigurðsson, Kormákur Steinn Jónsson og Fajer Ghazali sýndu einnig góða takta og söfnuðu mikilvægri reynslu gegn sterkum andstæðingum frá meðal annars Finnlandi og Wales.

Þátttakan á Pirkka mótinu er mikilvægur hluti af hæfileikamótun og uppbyggingu yngri landsliðshópa Íslands og ljóst að framtíð íslenskra hnefaleika er björt miðað við frammistöðu hópsins.

Hér fyrir neðan má sjá myndir frá mótinu eftir Mána Hrafnsson og þökkum við honum kærlega fyrir allar myndatökurnar um helgina.